2v 7

] mocujltonoz oniez in qujz in qujquaz tetlaqualtiz tecoanotzaz tetlacamatiz ipan calacoaz qujtechieltiz in atl in tlaqualli ypal ihiiocujoaz ypal ceviz in jiollo in jnacaio in tlaihiiovitinemj tlalticpac in iuhquj cochi in iuhquj meoa in jcnoveve yn jcnoilama in jcnopiltzintli in tlacnocaoalli yoan muchi neltiz muchi onieoatiz in tlein maailia atle nenqujçaz in jçiaviz yn jtlapaliviz atle nenvetziz vel motitianqujz in tianqujznaoac in nentlamachoian iuhqujn pipixaviz ipan tepeviz ipan tzetzeliviz yn jtiamjc Auh no yoã quitoaia ma nel ivi in qualli itonal ipan otlacat intlacamo vellamaceoa intlacamo vel monotza intlacamo qujcuj intlacamo itech qujpachoa in atl cecec in tzitzicaztli yn inonotzaloca in izcaliloca in veuetlatolli yn jlamatlatolli in çan tlaueliloti tlavelilocati in çan âie vtli qujtoca atle onqujça çan ynevian mopopoloa [fol v